كلمات ترنيمة : داري

^(ق) داري مهما تخبي وتداري
ربِّنا بهمومك داري


عنده حلول حاسس بيك من غير ما تقول
همَّك وقته يطول تِلجأ لِيه هيزول


⁽¹⁾ هُوَّ اللي تِندَه لِيه تلاقيه
وإيديه تقوم سانداك
دايمًا عينيه حارساك وبيه
تلقى الدموع سايباك


ارمي الشِّباك على كِلمِته
وهتتملي بالخير
من مَيِّتُه
العطشان
بيشرَب يرتِوِي ده قدير


⁽²⁾ قول رَبِّي نُوري وَخلاصي
مِن مين ها اخاف؟! ده كلام!
وحوش وجاهزين لافتراسي
لكن ف قلبي سلام


البَحر هايج؟ كلمته
ف التَّوْ هَتهَدِّيه
وبينقذ الغرقان
إذا اتعلَّق بيه هينجيه


⁽³⁾ ده راعي صالِح هيراعيك
هتضيق هيفتح باب
مش عَن مَصالِح حُبُّه ليك
حُبُّه ما لوش أسباب


وزي لمَّا بكلمته
قال كُن فكان هيقول:
ليكن نُور وأمان
وسلام يفوق كل العُقول


⁽⁴⁾ شايل همومك عالكتاف
مَحني وضعيف وحزين
من بُكره إنت بقيت تخاف
طب ربنا راح فين!


دي روح مع حياة كلمته
حيَّة وفعَّالة
بتبدد الأحزان
وتغَيَّر الحال وِالحالة



خريطة الموقع