كلمات ترنيمة : علشان مين

علشان مين جيت يا يسوع


علشان آدم علشان حوا اللي كسروا العهد وأكلوا


علشان أول أخ في دنيا حسده لأخوه خلاه قتله


ولا سدوم ولا عموره علشان لوط ومراته وأهله


علشان عيسو وأخوات يوسف والناس في زمن موسى يستاهلوا


علشان مين جيت يا يسوع


علشان مين جاي الدنيا جاي تخلص مين من النار


علشان شاول ولا داوود ولا علشان شمشون جبار


علشان قاتل علشان حاسد علشان حبة ناس أشرار


علشان شعب غليظ الرقبة جاي تتعذب وبإصرار


علشان مين جيت يا يسوع


ليه راضي في سكون وسكوت علشان مين جاي تموت


علشان مين جاي تتجرب وليه تدور على خروف


ولا عشان سامرية مريضة ولا عشان مفلوج ملهوف


ولا جيت علشان أعمى ويا ترى نظره خلاه يشوف


علشان بطرس ولا يهوذا والباقي اللي جري م الخوف


علشان مين جيت يا يسوع


عشان تتقابل بس معايا عشان كده يا يسوع جاي تموت


عشاني وعلشان الملايين وعلشان حبة ناس ضايعين


جاي تتحاسب وأنت بريء وليه تدفع أنت الدين


هافضل أسأل نفسي وأجاوب جاي تموت علشان مين


نفسي أفكر إنه علشاني وأفرح بيك قايم م الموت


وسؤال فاضل هز كياني علشان مين جاي تموت


علشان مين جيت يا يسوع


لما صلبوك اليهود لأ لما صلبوك الرومان برضو لأ


لا يهود صلبوك ولا حتى رومان ده بإيدي يارب أنا اللي صلبتك


أعمالي وشري في إيدي كرباج ونزلت بعزمي وجهلي جلدتك


أخرج من صمتك عنفني وأمسك كرباجي وكتفني


وبقوة حبك أضعفني ده أنا ياما غلطت وعذبتك


تسليمك طبعي وهوايه وفلوس بيعك لسه معايا


مع إنك محفور جوايا جوايا سألوني عليك روحت نكرتك


إنزف من قلبك من جنبك وأغسلني بمائك وبدمك


فتح عيني على حبك ده أنا ياما بغمض وبعاندك


ده الخل اللي شربته عصيري ومرار طعمه من تأثيري


الصدق قاتلك من تدبيري نزلتك قبري ودفنتك


كان قبرك ده يارب مكاني كانت أكفانك دي علشاني


وفى يوم هاترجع لي تاني
تاخدني لعندك يا ضماني



خريطة الموقع