كلمات ترنيمة : عنه ياما فضلت ابعد

عنه ياما فضلت أبعد
عمرى ضاع وملعشتلوش
يرق قلبه وقلبي يعند
ضّي عيني مابتشوفوش


أعمى من كتر الخطايا
قاسي أكتر م البداية
وهو بيكمل معايا
لو تطولنى شرور يحوش


يعنى أب أنا سيبت بيته
والمرار ليا اشتريته
مانسينيش علشان نسيته
ولا قلت أنا ماعرفوش


أجرحه يطبطب عليا
يلم جرحي يحس بيا
رغم قسوة قلبي فيا
وجعي وياه مالقاهوش


راضي إنى فى ضيقي أجيله
وأنسى فضله وقت أما أفرح
راضي بهمومى أشتكيله
جوه حضنه عاملي مطرح


إيه أساوي عشان يسامح
ماضي كان ليه كله جارح
يعنى إيه طول عمره فاتح
بيته ليا مهما بجرح


يعنى طيب رغم إنه
ساعات يعاقبني لكنه
بلقى رحمة كبيرة منه
لما لذنوبي بيطرح


أنده لو تعبي زادني
يمد إيده يخف حملي
شال فى عز الليل ساترني
حتى لو ف الدنيا بسرح


اللي بيجمل في صورتي
راسم السكة بإيديه
والغريب دايماً مرايتي
شايفة كل ملامحي بيه


جنبه أنا مايطولش ليلي
والدموع ماتشوفش عيني
الوحيد اللى باقيلي
واللى فرحي معاه وفيه


يعنى إيه مسمعش صوته
وأرفض ألمس هدب توبه
ألقى رده يكون سكوته
وحبه ظاهرلي فى عينيه


يعنى كل حبايبي غابوا
هو فاتح ليا بابه
يعنى لو يوم إبنه سابه
بيجري ويدور عليه



خريطة الموقع