كلمات ترنيمة : مد إيديك علي البحر يا موسى

^(ق) مِدّ إيديك ع البَحر يا مُوسَى
أنا أمرت وسَيَكون
(مَرَّة أخيرة وبعدها لن
تَرُوا تاني جُيُوش فَرعُون)2


⁽¹⁾ مِدّ إيديك ع البحر وشُقُّه
يَدِّي معَ الإيمان
(تِكسَر رؤوس التَّنَانين
وِتِسحَق لَوياثان)2


⁽²⁾ مِدّ إيديك بعصا الصَّليب
وِاضرَب ع المياه
(تُحصُد نُصرَة وتُحصُد أرض
والعدو يُحصُد آه)2


⁽³⁾ مِدّ إيديك ع البحر أنا جاعِل
لَك في البحر طريق
(واصمُت لِأنِّي راح اقاتِل
عنَّك وقت الضِّيق)2


⁽⁴⁾ مِدّ إيديك أنا مادِد يَدِّي
ع الأمواج وَيَّاك
(يُعبُر شعبي وأَعلِن مجدي
لعدُوي اللِّي عاداك)2


⁽⁵⁾ مِدّ إيديك صرخِتَك الصَّامتة
هَزِّت السَّمٰوات
(هاعبُر بيك وهاسَمَّع شعبَك
من أعاديك صرَخَات)2


⁽⁶⁾ مِدّ إيديك أصدرت أوامري
للبحر وها يطِيع
(والعدو مِتغَرّ وما يدرِي إنُّه
أمر جِيشُه يضيع)2


⁽⁷⁾ مِّد إيديك أعداءك مَدُّوا
وفَكَّرُوا إنِّي بعِيد
(والسَّما وجيوشها استعدوا
بفقرات التَّمجيد)2


⁽⁸⁾ مِدّ إيديك من تاني وقول له
يعُود بحر ولُه مُوج
(العدو فكَّر إنّ دُخُولُه
بحوري دي منها خُرُوج)2


⁽⁹⁾ مِدّ إيديك للشَّعب يسبِّح
وآدي مريم بدُفوف
(قول: «الرب اتمجِّد» وِافرح
خلِّي الأرض تشُوف)2


⁽¹⁰⁾ مِدّ إيديك ليشوع واتشفَّع
لِسَّه حُرُوب وحُرُوب
(إلى أن آتي بنفسي وأرفَع
لِلرَّاحه الشُّعوب)2


⁽¹¹⁾ (مدوا إيديكوا لمنّْ سمايا
وارتووا من صخر الدهور
تشبعوا من حضرتي وحمايا
إلى دهر الدهور)2



خريطة الموقع