كلمات ترنيمة : ومين يدوق الحب كله ويكتفي

⁽¹⁾ ومين يدوق الحب كله ويكتفي
من السباحة في مياه من الحياة


يا نفس هيمي واوعي في يوم توصفي
الحب عدّى م الصفة وم الأسماء


وإوعي تفلت العيون من شمسها
سيبي الشبه يرجع لأصله في الإله


سيبي له روحك انتي بس يمسها
ويشدها بالشوق ناحية قلب السما


كوني صلاة
وقولي: ياطيب الساعات
عيشي الصلاة
تلقي الحبيب مالي السكات


بقبلات
من فمه بكلمات
تمس بال
طهر الشفاه تحيي اللي مات


⁽²⁾ لكل عين عند البشر نور واتجاه
أما عيون الحق دربها صلاة


همّ العيون الدنيا كله في التراب
والعابدين عيونهم اتملت حياة


وفي مياه الراحة راحت القلوب
كل الرؤى متاحة للي جاي يتوب


عين الطهر اللماحة تهرب م العيوب
فتُحمَل في مساحة من نور المحبوب


تحيا حياة
مصغرة م السموات
عرش الحياة
في الذكر بين التسبيحات


تشوفه عين
اللي اتجه بلا طلبات
وعَبَر له حتى
م الآيات والتعزيات


⁽³⁾ ومين آدام الله عليه الإشراقات
بنفحة من أنواره في تجليات


إلا وداق الكل فيه انعكاسات
وجه المُحب اللي في وجه الصفحات


وشافوا لما شفّْ قلبهم إليك
إن ف نقاوة القلب اتشاف إللي ليك


ف رُحنا كلنا سكنّا في ضياك
فرَحنا كله ما شفناه إلا ف لقاك


يا مشتهى صنعة إيدين محبتك
يا ملتقى كل اللي داقوا صحبتك


مابيعيشوش على حالة واحدة ف سكتك
ولا يدوقوش الأنس إلا ف بسمتك


لي ما أراه
ولي ما لا ولم أراه
ف لي هو
وليس بعده ما أراه


أرى بلا
عيني وفي العين(يسوع) أرى
فهو هنا
في روحي كما في السما



خريطة الموقع